330 ЖК тіркеу кезінде кәсіпкерлер әдетте бизнес орналасқан жер ретінде өз тұрғылықты мекенжайын көрсетеді. Себебі, бастапқыда меншікте немесе жалға алынған коммерциялық ғимарат әрқашан бола бермейді. Бірақ кейіннен ЖК-нің нақты орналасқан жерінің мекенжайы өзгерсе (мысалы, кеңсе қаланың басқа ауданында ашылып, ол тұрғылықты мекенжайға қарағанда басқа салық органына қарайтын болса), не істеу керек? Басқа салық органына қалай қайта тіркелуге болады? Және салықтар мен әлеуметтік төлемдерді қайда төлеу керек: «жаңа» салық органына ма, әлде салықтарды – «жаңаға», ал әлеуметтік төлемдерді – бұрынғысына ма?
Салық кодексіне жүгінейік.
ҚР СК 80-бабы 1-тармағының 1) тармақшасына сәйкес, ЖК-нің тіркеу деректерін өзгерту рұқсаттар және хабарламалар туралы ҚР заңнамасында белгіленген тәртіппен жеке кәсіпкер ұсынған хабарлама негізінде салық органымен жүзеге асырылады.
ҚР СК 8-бабы 2-тармағына сәйкес, ЖК тіркеу деректері және (немесе) бірлескен кәсіпкерліктің қатысушылары (мүшелері) туралы деректері өзгерген күннен бастап 10 жұмыс күнінен кешіктірмей осындай хабарламаны орналасқан жері бойынша салық органына ұсынуға міндетті.
ЖК хабарламаны e-license порталы арқылы ЭЦҚ көмегімен бере алады. Ол үшін «Қызмет көрсету», «Хабарлама тәртібі», «Жеке кәсіпкер ретінде қызметті бастау туралы хабарлама», «Жеке кәсіпкер туралы мәліметтерді өзгерту туралы хабарлама» бөлімдері бойынша өту қажет.
Сондай-ақ, ЖК тіркеу деректерін Kaspi.kz мобильді қосымшасы арқылы да өзгертуге болады, «Мемлекеттік қызметтер» бөлімі, «ЖК деректерін өзгерту».
Жеке шоттарды жүргізу қағидаларына сәйкес, ЖК орналасқан жері өзгерген күннен бастап 10 жұмыс күні ішінде ЖК-нің жеке шоттары жаңа орналасқан жері бойынша МКБ-ға (УГД) беріледі. ЖК-ге жаңа орналасқан жері бойынша МКБ-да бұрынғы жеке шот жүргізілген МКБ-дан жіберілген кіріс сальдосын ескере отырып, жеке шоттар ашылады. Салықтарды ЖК орналасқан жері бойынша салық органына («жаңа» салық органына) төлеу қажет.
Әлеуметтік төлемдерді төлеуге қатысты айтсақ, ЖК орналасқан жерінің мекенжайы өзгерген кезде оларды төлеу тәртібінде ешқандай өзгеріс болмайды. Әлеуметтік төлемдер бұрынғыдай, мекенжай өзгергенге дейін қалай төленсе, солай төленеді.
Сонымен қатар, декларацияны толтыру кезінде негізгі нысанның соңғы бетінде әртүрлі КНО көрсету қажет (әлеуметтік төлемдер үшін бөлек және салықтар үшін бөлек).
Егер сізге бухгалтердің немесе салық маманының кеңесі қажет болса, «Mybuh.kz» сізге көмектеседі. Сондай-ақ біз кез келген нысандағы салық есептілігін жасап, тапсыруға көмектесеміз. Өтініш қалдырыңыз, біз жұмыс уақытында сізбен хабарласамыз.
