1949 Қызметкер жұмыстан шыққан кезде бухгалтерия қызметкермен толық есеп айырысу үшін бірқатар есептеулер жүргізуі тиіс. Жұмыстан шығу кезіндегі түпкілікті есеп айырысуға істелген күндерге еңбекақы төлеу, пайдаланылмаған еңбек демалысы үшін өтемақы, мүмкін болатын сыйақылар, бонустар және басқа да төлемдер кіреді. Ал бухгалтерияның түпкілікті есеп айырысу жүргізуі үшін қандай құжат негіз бола алады?
ҚР Еңбек кодексіне жүгінейік.
ҚР ЕК 23-бабы 2-тармағының 5) тармақшасына сәйкес, жұмыс беруші қызметкерге еңбекақыны және ҚР заңнамасында, еңбек, ұжымдық шарттарда және жұмыс берушінің актілерінде көзделген өзге де төлемдерді толық әрі уақтылы төлеуге міндетті.
ҚР ЕК 96-бабы 2-тармағына сәйкес, еңбек шарты бұзылған кезде (жұмыстан шығу себебіне қарамастан) қызметкерге жалақымен қатар пайдаланылмаған жыл сайынғы ақы төленетін еңбек демалысы күндері үшін өтемақы төленеді. Бұл төлем қызметкердің орташа жалақысы негізінде есептеледі. Жыл сайынғы ақы төленетін еңбек демалысының ұзақтығы күнтізбелік күндермен есептеледі және еңбек демалысына сәйкес келетін мереке күндері есепке алынбайды. Қызметкер бір жылдан аз уақыт жұмыс істеген жағдайда орташа күндік жалақыны есептеу үшін іс жүзінде істелген уақыт алынады.
ҚР ЕК 113-бабына сәйкес, еңбек шарты тоқтатылған кезде жұмыс беруші қызметкерге тиесілі барлық сомаларды еңбек шарты тоқтатылған күннен бастап 3 жұмыс күнінен кешіктірмей төлеуге міндетті.
Егер жұмыс берушінің кінәсінен жалақы мен еңбек шартын бұзуға байланысты өзге төлемдер кешіктірілсе, жұмыс беруші қарыз соманы және төлем жасалған күнді қоса алғанда, кешіктірілген кезең үшін өсімпұл төлеуге міндетті. Өсімпұл мөлшері ҚР ҰБ базалық мөлшерлемесінің 1,25 есесіне тең.
Осылайша, бухгалтерия еңбек шарты бұзылған күннен бастап 3 жұмыс күні ішінде барлық есеп айырысуды жүргізіп, қызметкермен түпкілікті есеп айырысуға тиіс.
Есеп айырысуды бастауға негіз болатын құжаттар:
- қызметкердің жұмыстан шығу туралы жазбаша өтініші;
- жұмыстан шығару туралы бұйрық.
Аталған құжаттарды алғаннан кейін бухгалтерия 3 жұмыс күн ішінде қызметкермен толық есеп айырысуы тиіс.
Егер сізге бухгалтердің, кадр маманының, заңгердің немесе салық жөніндегі сарапшының кеңесі қажет болса, сізге «Mybuh.kz» көмектеседі. Өтінім қалдырыңыз, біз сізге жұмыс уақытында хабарласамыз.
